Llión en Ruta, trece propuestas de sendeirismu en fala llionesa
La obra, escrita dafeitu en llionés pol sou autore, Alejandro Díez González, y acompañada de las fermosas ilustraciones de Ricardo Escobar Espiniella, trátase d’un cuadernu de viaxe pa coñocer la variedá xeográfica de la provincia de Llión al traviés de rutas de montaña.
L’Asociación Cultural Faceira en collaboración cona Editorial Cultural Norte publica la obra «Llión en Ruta, 13 propuestas de sendeirismu», del autor Alejandro Díez González, responsable del blogue sobre rutas y turismu rural La Senda del Hayedo.
La publicación preséntase acompañada de las fermosas ilustraciones de Ricardo Escobar Espiniella, quien yá ilustrara obras anteriores cumo «Llión Máxicu» ou «Esbardu, vocabulariu llionés ilustráu«.
Llión en Ruta trátase d’un cuadernu de viaxe redactáu en llengua llionesa qu’axunta trece rutas por distintos llugares de la provincia de Llión cumo Babia, Riañu, Altu Sil, Los Argüeḷḷos, Cabreira, El Bierciu, etc.
Al pía d’estas trece rutas, cada páxina d’esta guía dispón d’outros ingredientes que, xuntos, quieren convidar al llector a calzar las botas, abrir la puerta de casa y vivir estos paisaxes, a lo menos, con más interés que la última vuelta que pudo mirar a estos paraxes.
Porque’l sendeirismu tien dúas caras que, bien aproveitadas, facen d’esta actividá una de las más guapas de la vida. La guía apurre una cantidá importante de datos, que n’absolutu son técnicos ou de mala comprensión, sobre cúmo facer cada ruta de maneira segura y eficaz.
Pero hai outra perspectiva que va más allá de la deportiva y que chega a lo científico, a lo sentimental, a lo espiritual: la coñocencia del paisaxe cumo dalgu vivu, qu’interactúa con ñós. La unión de los dous ámbitos da llugar a un conxuntu de sensaciones qu’estas páxinas quieren amostrare.
Outramiente, con «Llión en Ruta», l’Asociación Cultural Faceira inaugura SERANU una nueva colección de publicaciones dedicadas a la divulgación y l’ensayu en llengua llionesa.
La presentación va ser el próximu miércoles, 27 d’outubre de 2021 a las 20:00 horas no Institutu Llionés de Cultura (entrada por C/ Santa Nonia 3, Llión), na que van intervenir l’autor y l’ilustradore.
