Cultura y deporte

Presentación del llibru «Llión Máxicu. Pequeña mitoloxía llionesa»

El volume, no que la mitoloxía cabreiresa está bien presente, podrá mercase nas llibrerías de la capital llionesa dende’l 27 d’abril

«Mouros» y «mouras» encantadas ou «trasgos», entre outros personaxes, cumo «L’home de la manu furada», son seres fantásticos qu’aparecen continuamente nas liendas y cuentos de tradición oral de Cabreira y qu’ora van tener una obra ilustrada de referencia pa los más piqueiños pero tamién pa tódolos públicos.

Esti llibru de l’Asociación Cultural Faceira trata de las criyaturas fantásticas del Reinu de Llión que los ñuesos mayores imaxinoron habitando en montes, pozos, peñas, cuevas, ruinas ou fuentes, y tien el propósitu de dar a coñecer d’una maneira prestosa al públicu mozu las liendas más significativas protagonizadas por dalgunos d’estos seres fabulosos. Las formosas ilustraciones de la obra facilitan l’acercamientu de la ñuesa rica mitoloxía a la mocedá, buscando una canal d’expresión moderna pa qu’esti aspectu de l’antigua tradición oral de Llión perviva nas nuevas xeneraciones.

Los sous autores son l’investigador de cultura tradicional Nicolás Bartolomé Pérez, quien apurre los textos n’asturllionés y castellanu de cada capítulu; y l’ilustrador Ricardo Escobar Espiniella, autor d’unos guapos debuxos nos que tamién participóu Eva Moreno Ruiz pintando y dando color, consiguiendo asina un espectacular resultáu que va facer d’esta obra un referente nos llibros de mitoloxía tradicional pa rapaces.

La sua presentación será’l próximu día 27 d’abril na Biblioteca Pública de la ciudá de Llión (c/ Santa Nonia 5) a las 20:00 horas, onde va estar disponible na presentación y tamién, dende esi día, nas llibrerias de la capital llionesa. En Cabreira estará’l 17 y 18 d’agostu na III Feria del Llibru Cabreirés que se celebrará en Trueitas.

Deja un comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.