Las voces más guapas de la ñuesa fala

Cientos de personas contribuyen nas redes sociales a buscar las diaz palabras más formosas que representarán a la llengua popular llionesa na Capital Europea de la Cultura 2018

Despuéis de la participativa campaña que l’Asociación Cultural Faceira promoviéu nas redes d’Internet y los medios de comunicación pa buscar las diaz palabras llionesas más formosas, esta asociación yá tien decidíu qué vocablos van estar presentes na Capital Europea de la Cultura 2018.

L’eventu, que se va facer en Ljouwert/Leeuwarden (Frisia, Paises Baxos), va sirvir pa representare, entre outros idiomas, a la variedá de la llengua asturllionesa propia de Llión no Talepaviljoen (Pabellón de las Llenguas), onde se van esponer diaz palabras seleccionadas d’entre las mueitas que fonon unviadas dende las redes sociales a l’asociación cultural.

De tódalas palabras que se recoyenon, fonon escoyídas las siguientes polos motivos qu’arréu s’apuntan.

Elixidas por ser las más votadas y de gran usu en llionés y tamién no castellanu rexonal de Llión:

  • Prestar: Gustare, agradare, satisfacere.
  • Telar: Máquina pa tecere, pero en sentíu figuráu y en plural refierse a un asuntu compricáu ou a una dificultá.

Elixidas por facer referencia a aspectos de la cultura llionesa:

  • Facende(i)ra: Trabayu en común de los vecinos d’un llugar pa facer piqueiñas obras d’interés xeneral.
  • Filandón: Xuntanza ivernal y nocturna de muyieres pa filar na que se solían contar cuentos, cantare, recitar romances y a veces hasta beillare.
  • Llariega: En sentíu literal yía la zona del suelu de la cocina onde se facía’l llume pa cocinar nas casas tradicionales llionesas, pero metafóricamente designa tamién a la propia vivienda.

Elixidas pola sua sonoridá, singularidá ou formosura:

  • Fervienza: Desnivel pronunciáu nún cursu d’augua (fa referencia a que l’augua al cayer parez ferver pol sou soníu y las burbuxas que produz).
  • Llumbreiru: Tea d’urz p’allumare (sistema antigüu d’iluminación nas zonas rurales llionesas antias de xeneralizase la electricidá).
  • Panxulina: Insectu lepidópteru que normalmente tien dous pares d’alas grandes, escamosas y de colores que rescamplan (yía unu de los mueitos nomes que tien esi insectu en Llión, y de los más guapos).
  • Señardá: Melancolía, tristura, emoción, sentimientu de soledá.
  • Xeitu: Modu, aspectu, compostura (yía una palabra con una fonética típicamente llionesa, y con un significáu difícil de traducir al castellanu ou a outras llenguas).
¡Préstanos pula vida que nos compartas!
Share on Facebook
Facebook
Share on Google+
Google+
Tweet about this on Twitter
Twitter
Email this to someone
email
Print this page
Print

Un comentario sobre “Las voces más guapas de la ñuesa fala

Deja un comentario

Tu dirección de correo electrónico no será publicada. Los campos obligatorios están marcados con *