La Universidad de León recueye nuevos testimonios de la fala de Corporales y La Baña
Una riestra de vídeos amuestran la viveza na que güei s’alcuentra la fala cabreiresa nestos llugares
La Universidad de León, desde la Cátedra de Estudios Leoneses (entidá creyada pal estudiu, la investigación, la docencia y la divulgación de los aspectos específicos de la cultura no ámbitu llionés), está ellaborando un mapa audiovisual de las falas tradicionales de Llión. Pa esti trabayu de campu falonon con personas de distintos llugares cumo Cabreira, Ḷḷaciana, Palacios del Sil, Senabria, Miranda de l Douro ou Aliste, entre outros. La documentación y ellaboración de los audiovisuales, ficieronlu la productora RICI, quien yía autora del documental “Llionés, la llingua llionesa” ganador del certame de cine Cinencinedo del añu 2017.
La Cátedra de Estudios Leoneses, que yá recoyera testimonios orales hai un añu en Quintaniella, en Cabreira l’Alta, y na Baña. Repite esta vez no llugar de La Baña y chiga tamién hasta Corporales.
Las amuestras d’audiu recoyídas nestos llugares, amás de sirvir cumo rexistru oral del dialectu bañés, tamién van sirvir cumo testimoniu del padremuñu etnográficu del ámbitu xeográficu cabreirés. Nos vídeos aparecen el bañés Pepe Beneítez, quien fala de cúmo se fa una gayata, los cestos ou las maniegas. Xunto a Pepe está Pablo Liñán pa falar de cúmo se fa la fogaza tradicional cabreiresa.
En Corporales tenemos los testimonios de Sagrario Liébana, quien tamién va falar del fornu y la cocina, la matanza, el carru y el ganáu, la llabranza, el llinu, el lleite mazáu, los xogos y los reflanes.
Todos estos elementos forman un compendiu de tradiciones y sabiduría popular que desde siempre fonon parte de la vida diaria y la cultura de Cabreira.
Los testimonios recoyíos
