El I Certame Literariu Infantil “Eva González” fomentará la creatividá en llionés ente los escolares de la provincia

L’Asociación d’Amigos de Sierra Pambley, en colaboración col Institutu Llionés de Cultura (ILC), convoca el I Certame Literariu Infantil “Eva González”, un concursu a nivel provincial dirixíu al alumnáu d’educación primaria (ente 6 y 12 años), col oxetivu d’impulsar la escritura creativa en llingua llionesa en sus distintas variantes

Esti certame, que lleva’l nome de la escritora llacianiega Eva González, se caracteriza por ser nun competitivu, de maneira que nun habrá un único ganador. No sou llugar, el xuráu escoyerá aqueillos trabayos con mayor calidá literaria, que van a ser asoleyaos n’una edición especial. Amás, tódolos participantes recibirán un detalle por parte del ILC, consistente nun viaje con visita cultural.

Podrán participar no certame tódolos alumnos que lo deseen, ensin importar el sou llugar de residencia, siempre que’l trabayu se presente en cualesquier variedá de la llingua llionesa falada na provincia de Llión. El tema de los trabayos estará vinculáu cola ñaturaleza (animales, árboles, plantas…).

El xuráu estará formáu por miembros de l’Asociación y outros colaboradores con conocimientos de paḷḷuezu, y por una persona designada pol ILC pa la valoración de los trabayos presentaos n’outras variantes de la llingua llionesa.

Los trabayos deberán unviase al corréu electrónicu as.asierrapambley@gmail.com, indicando nel asuntu: CERTAME LITERARIU INFANTIL. El archivu llevará por nome’l títulu del trabaju y, al final del textu tien d’asoleyase los datos del participante: nome y apellíos, edá, cursu y centru escolar al que pertenez, asina como un teléfonu de contactu.

• Prazu d’entrega: hasta’l 14 de noviembre de 2025.
• Fallu del xuráu: daráse a coñocer el 12 de xaneiru de 2026.