Calechos d’iviernu 2023: Con mirada de muyer

El vienres 3 de febreiru principian las xornadas culturales organizadas pola Asociación Cultural Faceira y la Conceyalía d’Acción y Promoción cultural del Ayuntamientu de Llión

Estiañu los «Calechos d’iviernu» van tener cumo eixe temáticu la muyer en Llión y el sou papel na historia, na arquitectura tradicional y na tresmisión de la música de tradición oral, conteníos que vienen a completase con una conferencia d’apertura, d’asuntu ecolóxicu y igualmente realizada por una muyer, sobre la conservación del urogallu cantábricu.

El calechu yera una reunión típica de los puebros de la montaña noroccidental llionesa, concretamente de las comarcas de Ribas de Sil, Ḷḷaciana, Babia, Oumaña, Ḷḷuna, Ordás y El Bierciu, onde se conoz cono ñome de caleyu.

Al cabu la tarde, axuntábanse varios vecinos y/ou achegáos na calle –se’l tiempu lo permitía– ou na cocina d’unu d’ellos, cono propósitu de pasar d’un xeitu prestosu un buen ratáu antias de cenar nas llargas tardes d’iviernu, estación na qu’había menos que facer que n’outras épocas del añu.

Parez que tantu’l vezu cumo’l términu tienen el sou orixe nas xuntanzas que se facían antaño pa repartir las velías de caltenimientu, cebáu y andar al pesque de las trapas pa llobos, chamadas calechos, asina cumo determinar outros detalles d’ellas.

El calechu yera principalmente una tertulia na que se comunicaban las anuncias de la vida diaria, onque tamién podía xugase a las cartas y contase historias divertidas, cuentos y cousillinas, estas últimas dedicadas especialmente a los rapaces. Tamién yera’l momentu no que s’acordaba ónde s’axuntarían pola ñueite pal seranu onque, estremáu d’ésti, no calechu nun se solía trabayar y, por tanto, tenía un aquel mayormente lúdicu, d’ehí’l protagonismu de la xente moza en mueitos casos. Pero amás d’engayolare, dacuando’l calechu tenía un llau pedagóxicu, yá que yera aproveitáu polos padres pa deprender a los sous fiyos cousas de la escuela.

Cona celebración de los Calechos d’iviernu, l’Asociación Cultural Faceira y la Conceyalía d’Acción y Promoción Cultural del Ayuntamientu de Llión nou solo rinden homenaxe a esta costume, senou qu’intentando xuntar esparcemientu y educación, buscan emponderar y difundir una parte del gran padremuñu cultural llionés al traviés de trés conferencias y una charla-conciertu que serán protagonizadas por siete muyeres llionesas baxo’l siguiente programa:

03/02/2023. Beatriz Blanco Fontao (Santa Lucía, Llión): «Los últimos feisanes».

10/02/2023. Teresa García Montes (Viguillina, Llión): “Espacios femeninos na arquitectura tradicional llionesa”.

17/02/2023. Miryan Rodríguez San José (Ponferrada, Llión): “Muyeres na historia de Llión”.

24/02/2023. Carmen Marentes, Yolanda García, Amanda Alvarez y Laura Collar (Ḷḷaciana, Llión): “La muyer y la tresmisión de la música de tradición oral” (Charla-Conciertu).

Tódalas intervenciones son de vienres ya principian a las 19:30 horas no Palaciu del Conde Ḷḷuna (Praza del Conde Ḷḷuna, 24003, Llión)

Dirección y coordinación: José Ignacio Suárez García