VI Transtrevinca 2018

El próximu sábadu 2 de xuniu va dar comienzu una nueva edición de la travesía de monte que trascurre entre dous países, cuatro contornas y ocho ayuntamientos

La prueba qu’organiza’l Club de montañismo Sanabria va tener un trazáu de más de 70 quilómetros y 16 horas ininterrumpidas de duración, y va principiar no aeródromu de la ciudá pertuguesa de Bregancia (Bragança), concluyendo no cimeiru de Peñataravinca, onde se va facer un harmanamiento con outros clubes de monte gallegos. La travesía nun yía una competición per se, senou que pretende sirvir cumo eixe d’unión de tódalas aldeyas y puebros que recuerre, pudiendo esfrutar asina de las tradiciones y el paisaxe natural de cada llugar.

La fecha d’inscripción yía de baldre y va rematar el 25 de mayu. Antias d’esa fecha puede facese cubriendo esti formulariu. Tal qu’indican los organizadores, quien nun deseye facer toda la andarina va poder incorporase a cualesquier de los puntos de salida ou chigada de la siguiente lista, onque va ser necesariu que s’indique no formulariu ónde s’incorpora cada persona:

• Hora d’alcuentru no Aeródromu de Bregancia a las 23:30 del 1 de xuniu de 2018 (22:30 hora pertuguesa).
• Hora de salida no Aeródromu de Bregancia a las 00:01 del 2 de xuniu de 2018 (23:01 del 1 de xuniu hora pertuguesa).
  
• Varge: 1:45 am.
• Ruidenore-Rihonor (no puente): 4:00 am.
• Unxilde 6:15 am.
• Hora d’alcuentru no Pilón de La Viella-Puebla de Sanabria 6:45 am.
• Salida de La Viella-Puebla de Sanabria: 7:00 am.
• Peña la Olla-Castellanos: 7:30 am.
• El Puente: 8:00 am.
• Galende Ribiella: 9:00 am.
• Pedrazales: 9:30 am.
• Vigo: 10:30 am.
• Llaguna de lus Peixes: 12:30. Descanso pa almorzar y salida a las 13:00.
• Peñataravinca: 16:30 – 17:00.
• Llaguna de lus Peixes: 20:00 – 21:00.
• San Martín de Castañeda, Bar Chiviteiro: Merienda y chiculatada (cadagunu tien de llevar la sua taza).

Las personas que participen no tramu que se va facer pola ñueite tienen de llevar frontal y chalecu reflectante. Asina mirmu, aconséyase llevar calzáu cómodu hasta Vigo ou la Llaguna de lus Peixes y ende ponese l’equipu de monte. Los organizadores tamién recomiendan vistir roupa y calzáu de monte impermeable, asina cumo llevar augua y comida abondu. Amás, aconseyan tener un seguru de monte, ya que las personas participantes van facer la carreira baxo la sua propia responsabilidá, y se asocede dalgún accidente alviértese que va ser avisáu l’equipu oficial de rescate onque la persona mancada diga que nou. Pa rematar, siñálase la necesidá d’estar puntuales a la hora de salida, onque las personas que lo deseyen van poder quedar antias se quieren tomar dalgu.

Más información na páxina del Club de montañisno Sanabria.