VI Alcuentru d’Escritos Llibertarios en Llión
Las xornadas principian cona proyección del documental «Un guerrillero llamado Santeiro»
Por sextu añu vuelve l’Alcuentru d’Escritos Llibertarios con unas xornadas llenas de difusión y reflexón sobre distintas temas desde posiciones llibertarias.
La cultura, la reflexón y la diversión van xunías nestas xornadas. Documentales, charlas y presentaciones, teatru, una mesa redonda, micro abiertu… Amás, van asistir editoriales y va haber puestos de fanzines y llibros.
El llunes 11 de samiguel principian las xornadas cona proyección de «Un guerrillero llamado Santeiro», documental que recupera una parte de la historia de la guerra y la posguerra n’El Bierciu.
Siguiendo cona recuperación de la memoria histórica, el martes va representase en Sierra Pambley «1975. Verbenas de agosto» una pieza de teatru alredor de las alcordanzas sin compartir sobre la dictadura.
Al outru día, vuelve la tradicional amuestra de viñetas llibertarias nas caleyas. Antias, una charla va acheganos a la figura de B. Traven, más conocíu cumo Ret Marut, escritor y artista de teatru anarquista del siegru venti.
El xueves dará voz al proyectu Errekaleor Bizirik, un barriu de Vitoria-Gasteiz autoxestionáu desde fa 10 años. De siguío, va ser la velía de las falas minorizadas, una charla que va deixar conocer la situación tanto de las llengüas oficiales cumo de las non oficiales, entre ellas, l’asturllionés.
El vienres a la tarde va principiar cona presentación d’un proyectu artísticu sobre l’albuertu expontáneu desde la creatividá y la reflexón. Despuéis, va haber una mesa redonda sobre’l movimientu LGBTIAQ+ y va animase la ñueite con un micrófonu abiertu de poesía.
La fin de sumana va haber actividades todu’l día, principiando por un trueque de granas al que va siguir un almuerzu pa reponer fuercias. Yá pola tarde va presentase´l postreiru námeru de la revista feminista La Madeja y dous llibros de crítica social y anarquista.
El diumingu, últimu día de las xornadas, principia con una ruta de teatru que va pasar polas cais de Llión amostrando las fuelgas y manifestaciones de los postreiros 70 años. L’alcuentru va terminar con una rifa colaborativa p’apoyar a la organización de las xornadas.
