Fiestas en Pombriegu pur San Antonio de Padua
Esti llugar cabreirés celebra lus días 9 y 13 la festividá n’honor al Santu lisboeta
El sábadu día 9 de xuniu principian las fiestas de San Antonio en Pombriegu que van estar animadas pula mañana, a las 11:00 horas, cuno pasacalles del grupu AIRES DE CABRERA. Despuéis, a las 13:00 horas, Santa Misa y precesión, que va siguir cuno vermú y el beille cuno mirmu grupu de música tradicional d’esti llugare. Pula ñueite, a partir de las 21:30 horas, beille de tarde y verbena a las 1:00 horas cun TRÍO EXPRESIÓN.
El miércoles día 13, día de San Antonio, principiará cun pasacalles de la charanga RÍO SELMO a las 11:00 horas, y despuéis Misa y precesión a la 13:00 horas siguíu del beille vermú cuna mirma charanga.
Outrus datus d’interés
Pombriegu yía una guapa aldeya onde se pue visitar al pía de la sua igresia’l chamáu cumu l’Árbol del Amore, qu’en primavera lluz espectaculare. El puebru está arrodiáu de campus qu’antias forun llabraus cumu tierras de centenu, monte baxu, soutus de ribeira formaus pur oumeirus, salgueirus y freñus, y un singular monte de sufreirus no llugar que chaman La Remangada. Purbaxu’l puebru, cerca del barriu de Lus Chanus, desaugua’l rieu Benuza no Cabreira. Esti postreiru tuvo nas suas ouriellas una ferrería construyida no siegru XVIII pul abá Benitu Zoube del Monesteriu de San Pedro de Montes.
