Cultura y deporte

Corporales festexa San Antonio

La localidá de Corporales celebra esti sábadu las fiestas de San Antonio, unos festexos que, entre outras actividades, incluyen alborada y beille hasta altas horas de la madrugada

Sigún cúntanos los sous vecinos, la fiesta principia a las 7 de la mañana con una alboreada realizada polos gaiteiros de la localidá, los famosos gaiteiros de Corporales. Yá a las 12 de la mañana va ser la misa con procesión polas caleyas de la localidá amenizada polos mesmos gaiteiros. Yá pola tarde, un grupu musical pondrá la nota de color cona sua música pa la verbena de tarde, mientras que los mayordomos de turnu van agasayar a los presentes con bebida y comida.

Cartel de Fiestas

Una vez cenaos, los habitantes de Corporales volverán pa siguir cona música del grupu hasta altas horas de la madrugada. Esta fiesta, yíe una de las más tradicionales de Corporales, onque como bien dicen, «yíe más guapa la de San Antonio d’enviernu». A primeiros d’añu noman dous mayordomos que serán los encargaos d’organizar la fiesta de San Antonio d’enviernu y de branu. Estos mayordomos yieran los casaos esi añu y si había mas de dous matrimonios esi añu, quedaban p’años socesivos. Na actualidá los mayordomos escuéyense por velía. Entre las suas obligaciones están la de llimpiar la igresia y organizar las dúas fiestas.

La fin de selmana anterior al 17 de xaneiru, los mayordomos recuerren el puebru pidiendo a la xente que-yes da carne de la matanza y dineiru, onque anguaño la mayoría de la pobración da-yes dineiru, on asina tódolos años recaudan una buena cantidá de chourizos, androyas etc… Esta carne va ser subastada’l día 17 de xaneiru a la salida de misa. Unu los habitantes de la localidá encárgase de subastar lo recoyío polas casas mientras los mayordomos d’antiguo agasayaban a los asistentes con una copína d’auguardiente y unas galletas, anguaño sustituyidas por vermú, aceitunas y patacas fritas. El dineiru recaudáu destínase a organizar la fiesta d’esti sábadu, del «San Antonio del branu» y las misas necesarias.

El visitante d’estas fiestas va poder aproveitar pa visitar unu de los puebros con mayor hestoria arqueolóxica de la comarca, debíu sobre todu a la ubicación eiquí de la Corona (conocíu tamién cona denominación de Castro de Pedrero), asentamientu prerromanu que data de mediaos del siegru I antes de Cristu, al N del barriu de Pedrosa, entre los rieos Eria y La Manzanal, nuna llomba de suaves lladeiras, defendida mediante la enclina del terrenu y un fosu craramente visibles pol llau septentrional. Outru llugar d’importancia histórica yíe’l Castru, chamáu del Palombar ou d’Encimalafuente, al Oeste del puebru, a media lladeira que nun gocia de condiciones defensivas naturales, estando arrodiáu por dous fosos d’anchura variable desde’l SO al NO. Esti castru mineiru, estuvo ocupáu desde los últimos años del siegru I a. C. hasta los primeiros años del siegru II d. C..

No valle que forma la nacencia del rieu Eria conas faldas meridionales del Picu Talenu, al llau de Corporales, pueden apreciase diversas canales que recueyen l’augua de los rigueiros Tolaniel, Valdepráu, Revesa, Valdespinu y Llamas, entre outros, elementu imprescindible pa sapartar l’ouru de la tierra aluvial nas diversas esplotaciones esistentes nesta zona. No rigueiru Mascariel, al pía mesmu del Picu Talenu, pueden constatase aperturas mineiras, pero será’l Arroyu de Las Rubias el de mayor importancia na llavadura. Aprécianse tres grandes canales, una d’eillas na mesma divisoria cono rieu Duerna, de las que parten outras secundarias, fundamentalmente na collada que saparta’l Picu Talenu de Peña Cetrera. Más restos arqueolóxicos, de dataciones mas recientes, son: – Galerías y pozos soterraños na base oriental de la llomba onde se llevanta la Corona. – Nos muros esteriores de l’actual igresia, puede contemplase un arcu románicu de mediu puntu, con decoración d’axedrezáu no sou trasdous. – Una ferrería de propiedá privada, perfectamente conservada y na que puede apreciase las distintas partes d’una fraugua antigua.

Deja un comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.