Cultura y deporte

VI Xornadas de Patrimoniu Lingüísticu y Cultural na Valdería

El Teixu, Rede pal Estudiu y Defensa de la Llingua Asturllionesa celebra esti eventu los próximos sábadu 22 y diumingu 23 de diciembre, cona colaboración de la Xunta Vecinal de Ñogareyas y de numarosas empresas locales

El centru cultural, la tabierna y la igresia de Ñogareyas van acoyer un ampliu programa que contará cona presencia de Fernando Álvarez-Balbuena, Andrés Menéndez, José R. Morala, Mónica Rodríguez, Alcides Meirinhos, Nicolás Bartolomé, José Luis Gutiérrez, Máximo Carracedo, Isidora Rivas y Carlos Huerta.

Las xornadas van comenzar el sábadu 22 a las 11:30 no centru cultural, cona entrega de premios del I Concursu Infantil de Recoyida de Toponimia Oral na Valdería, convocáu nas escuelas de la comarca. L’actu contará amás cona charla ¿Cúmo se faz una investigación toponímica de campu?, al cargu del lingüista de la Universidá d’Uvieo Fernando Álvarez-Balbuena. Pa rematar, presentarase la colección de mapas d’El Teixu Cartografía toponímica del espaciu llingüísticu asturllionés, de la qu’acaba de publicase’l primer númaru, correspondiente al conceyu asturianu de Tinéu, y se dará cuenta del estáu de los trabayos de los mapas de las provincias de Llión y Zamora.

A las 17:30 de la tarde vuelve la programación al centru cultural con una serie de microconferencias de todu’l dominiu lingüísticu, que van comezar con La Cátedra de Estudios Leoneses: objetivos y líneas de trabajo del profesor de la Universidá de Llión José R. Morala, a la que seguirá Mónica Rodríguez Riesgo, técnica de normalización lingüística, que tratará sobre Una aproximación a la normalización lingüística n’Asturias. Tras una pausa pal café, será’l turnu del escritor pertugués Alcides Meirinhos, cona ponencia La Casa de la Lhéngua Mirandesa y los vinti años de la Llei del Mirandés. Pa rematar, l’investigador Nicolás Bartolomé Pérez presentará El llabor editorial de l’asociación Faceira.

Paralelamente, na tabierna de Ñogareyas va proxectase, tamién a partir de las 17:30, el ciclu documental La fala de los nuestros paisanos, con muestras audiovisuales de falantes de todu’l dominiu lingüísticu. Y esti sitiu acoyerá tamién el remate de la programación del sábadu, cono espectáculu de cuentacuentos Us cuentus del filandare, al cargu del narrador José Luis Gutiérrez “Guti”, a las 23:00 horas.

El diumingu, la programación empieza a las 11:30 na igresia de Ñogareyas, cona IV misa d’avientu, que’l sacerdote Máximo Carracedo oficiará n’asturllionés. Y a las 12:30, Isidora Rivas Turrado, la mayor estudiosa de la variedá lingüística local, ofrecerá no centru cultural la charla Voces del Ería: el leonés hablado en La Valdería.

A las 17:00 no centru Cultural tendrá llugar la presentación de la serie audiovisual d’El Teixu Videoteca de la llingua asturllionesa, una colección de grabaciones que tien por obxectu mostrar la realidá actual de la llingua asturllionesa en todu’l sou territoriu. A continuación, va proxectase’l ciclu de videos musicales Xuntos na diversidá, con grupos d’Asturias, Llión y Miranda. Y la música va poner tamién el remate a las xornadas a las 19:00 na tabierna, cona estrena de la obra La fala d’un cantar, de Carlos Huerta “El Solito Trovador”.

Las Xornadas de Patrimoniu Llingüísticu y Cultural celébranse anualmente en distintos llugares de la provincia de Llión y pretenden destacar el valor incalculable de las variedades del asturllionés que sobreviven nestas zonas. Depuéis de realizase n’Estorga, Llión, Viḷḷablinu, Villamejil y Oseya, El Teixu llega a outra de las fronteras del idioma, La Valdería, pa reivindicar que nesta comarca llionesa ontavié se fala l’asturllionés.

Fuente: elteixu.org

Deja un comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.