El Teixu convoca un concursu infantil de recoyida de toponimia nas escuelas de La Valdería

El fallu va dase a cuñocer el 22 de Ñavidá, nas VI Xornadas de Padremuñu Lingüisticu y Cultural que se celebrarán en Ñogareyas

El Teixu, Rede pal Estudiu y Defensa de la Llingua Asturllionesa, convoca’l I Concursu Infantil de Recoyida de Toponimia Oral na Valdería, dirixíu al alumnáu menor de 14 años d’esta comarca. Los trabayos tienen que entregase antias del 4 de Ñavidá (diciembre) nas dependencias de las escuelas de Castrucarbón ou Castrucontrigu.

Con esti concursu quier animase a los rapaces y rapazas de La Valdería a convertise en pequeños investigadores de la toponimia de la súa contorna, escoyendo buenos informantes a través polos cuales puedan cuñocer los ñombres de los sitios de la comarca. El modelu que se presenta a los alumnos permite que recueyan todu tipu de topónimos, asina cumo liendas y historias relacionadas conos sitios del sou puebru. Amás, incluyese la posibilidá de debuxar un mapa del llugar escoyíu pa la investigación.

Cada participante puede presentar unu ou más trabayos a concursu, siempre que correspuendan a puebros distintos. Neillos, recoyerase’l máximu posible de topónimos: barrios, molinos, puentes, rieos y regueiros, llagunas, tierras, praos, termaneiras, montes, sierras, picos, peñas y piñeos, fuentes… Los topónimos, en cualquier casu, tienen qu’estar recoyíos oralmente entre la pobración del términu. La inclusión de material complementariu y la diferencia d’edá de los participantes será un factor consideráu pol xuráu a la hora d’escoyer los trabayos premiaos.

Pa participar no concursu, los trabayos tienen qu’entregase antias del 4 de diciembre d’aguaño nas dependencias del CRA Ería Jamuz en Castrucarbón (C/Las Escuelas, 6) ou del CEIP Antonio Justel de Castrucontrigu (C/Las Escuelas, s/n). El resultáu del concursu cuñocerase’l sábadu 22 de diciembre, na celebración de las VI Xornadas de Padremuñu Lingüísticu y Cultural organizadas por El Teixu no Centru Cultural de Ñogareyas.

Un xuráu formáu por trés personas, escoyidas entre miembros d’El Teixu, expertos en lingüística y xeografía y estudiosos de La Valdería y las comarcas vecinas, que nun cuñocerán l’autoría de los trabayos, va outorgar un primer premiu, consistente nún lote de llibros y de productos artesanos de la Valdería. El xuráu puede establecer hasta trés segundos premios, que recibirán tamién llibros y productos artesanos cumo premiu.

El cuñocimientu de la toponimia tradicional del espaciu llingüísticu asturllionés yíe unu de los obxectivos prencipales d’El Teixu, no que trabaya tanto cona investigación directa cumo promoviendo concursos de recoyida toponímica. Hasta ora, esta asociación tien realizaos dous certámenes de recoyida p’adultos no Bierciu y con esti concursu estrénase na Valdería con un formatu completamente ñuevu, dirixíu a los más pequeños de la casa.

La toponimia tradicional, esquecida pola alministración, todavía permanez viva na Valdería, cumo una amuestra más de la cultura que s’expresa n’asturllionés. Implicar a las xeneraciones más ñuevas no usu, na defensa y na investigación d’esti tesouru de valor incalculable yíe una maneira de garantir que nun desapareza.

Bases del I Concursu Infantil de Recoyida de Toponimia Oral na Valdería

¡Préstanos pula vida que nos compartas!
Share on Facebook
Facebook
Share on Google+
Google+
Tweet about this on Twitter
Twitter
Email this to someone
email
Print this page
Print

Deja un comentario

Tu dirección de correo electrónico no será publicada. Los campos obligatorios están marcados con *