Furmientu publica «Xeira. Compendio gramatical de sanabrés»

Despuéis de varios años de trabayu, l’asociación cultural zamorana acaba de publicar una obra qu’amuestra d’una maneira didáctica los prencipales elementos gramaticales de la fala padremuñal de Senabria

Con esta publicación Furmientu quier impulsar el procesu de protección y promoción de la fala senabresa. Podemos dicir que na actualidá’l senabrés s’alcuentra nuna situación paradóxica. Por un llau, a lo llargo de los postreiros llustros fonon apareciendo diversos autores y iniciativas que recoyenon el guante de la reconocencia, valorización y usu del senabrés. En Furmientu amás de ser testigos d’ello, fonon parte d’ese procesu. Por outru llau, en 2007 cona reforma del estatutu d’autonomía de Castilla y León establecíuse la reconocencia legal del senabrés y d’outras variedades del llionés, abriendo asina un horizonte qu’en gran midida on está por desenvolver y afondar en numarosos aspectos, cumo la enseñanza, l’usu de la toponimia tradicional, etc.

Este manual, escrito pol sociu de l’asociación Severino Alonso, tien cumo obxectivu básicu facilitar la conocencia y deprendizaxe de la fala padremuñal de Senabria a todos aquellos qu’asina lo deseyen. Nun pretende ser una obra absoluta, senou axuntar nella los prencipales elementos gramaticales, basándose nas falas de los llugares que lu han manteníu meyore. Tal cumo comentan desde la asociación «pa ello nun se fizo un manual que pueda considerase difícil ou muei técnicu, más bien optemos por facer que seya didácticu, accesible a todu tipu de llector, inclusive a aquellos que nun tuvieran la oportunidá de conocer el senabrés. Asina, xuntu cono eixe central de la obra conformáu polos aspectos fonéticos, ortográficos y morfosintácticos, quixímos completala añediendo dous apéndices: el primeiru recueye una serie de vocabularios básicos y el segundu, una selección de textos literarios y traducciones qu’ilustran l’usu escrito del senabrés».

La portada de Xeira tien dous aspectos significativos. Por un llau, la asociación aproveitóu esta publicación pa, despuéis d’algunos años, estrenar un nuevu logotipu de Furmientu. Por outru, el textu de la portada está rellacionáu con un extractu adaptáu de la lienda del llagu de Senabria, recoyida nos años cuarenta por Luis Cortés en San Martín de Castañeda y publicada en ‘Leyendas, cuentos y romances de Sanabria’. «Yía una maneira simbólica de querer unir lo antiguo y lo nuevo, siendo Xeira un eslabón más nesa cadena interxeneracional que da y recibe lo más guapo de nós mesmos. Escoyimos cumo títulu de la obra esta palabra senabresa nou yá por presentar dalgunas trazas distintivas de la fala padremuñal, senou tamién por aludir a ese llabor senciellu, cotidianu y esforciáu que siempre yía necesariu pa llevar alantre los proyectos más grandes», comentan desde Furmientu.

L’asociación zamorana nun quier esquecer «qu’el senabrés s’alcuentra nuna situación bien difícil, siendo múltiples las causas que lo deterioran. Nun hai duda que la emigración y la fulminante despobración principiadas na segunda metá del siegru XX son craves no sou progresivu deterioru. Los falantes patrimoniales qu’on lo recuerdan ou usan son cada vez más escasos y vieyos, y la trasmisión interxeneracional cuerre un craru riesgu d’acabar. Pero tamién yía ciertu que, mientras outras dimensiones del padremuñu cultural sí atoponon ecu na pobración senabresa, dando llugar a iniciativas, la faceta lingüística sigue arrastrando una serie de prexuicios qu’enzancan la sua dignificación y normalización. Por distintas rezones, en Senabria sigue habiendo un gran desconocimientu, una probe conciencia lingüística y una imaxen bien negativa sobre la sua propia llengua, actuando cumo llouxas pesadas qu’atrancan dafeitu cualquier procesu de recuperación. Amás, las instituciones públicas, que tienen una grave responsabilidá no sou mantenimientu y dignificación, nun estuvienon a la altura. D’este xeitu, las actuaciones neste sentíu quedonon básicamente en manos de colectivos culturales y personas individuales que siguen apreciando’l sou valor cultural. Por eso, podemos afirmar que na actualidá’l senabrés s’alcuentra nún decisivu ‘impasse’. Onque pueda sonar a frase feita, de nós depende que la fala patrimonial de Senabria siga siendo una rialidá viva ou definitivamente pase a ser un obxectu ‘arqueolóxicu’ muertu propiu d’especialistas. Creyemos que la cultura senabresa en tódalas suas dimensiones merez ser mantenida, normalizada y trasmitida a las próximas xeneraciones. Yía una riqueza del padremuñu que fala, nou yá de quién fonon, senou de quién son y van ser los senabreses. Sigue siendo una parte del padremuñu humanu de la contorna que se chegara a perdese, supondría una grave amputación cultural. Las circunstancias parecen nun ser aparentes, pero desde Furmientu creyemos que cono trabayu y la implicación de mueitos más puede ser posible rescatar el senabrés d’una próxima desaparición».