El llionés, una llengua viva… tamién na televisión
La colaboración de Faceira y El Teixu, asociaciones en defensa del llionés, xunto a la Cátedra d’Estudios Llioneses y la productora televisiva Twimagen, da cumo resultáu EL LLIONÉS, UNA LLENGUA VIVA, un espaciu televisivu sobre esta llengua que principia emitise’l próximu llunes, 19 d’outubre, na 8 León TV.
Características, espaciu xeográficu, historia, variedades, toponimia, tradición oral, música, situación legal… Todos y cadagunu de los ámbitos que tienen relación directa cona llengua llionesa dirán esgranándose n’EL LLIONÉS, UNA LLENGUA VIVA, nuna riestra d’once capítulos monográficos sobre este idioma que s’estrenará en televisión el llunes que vien.
Ese espaciu televisivu ñaz de la colaboración de las asociaciones en defensa de la llengua El Teixu y Faceira xunto a la Cátedra d’Estudios Llioneses de la Universidá de Llión y la productora leonesa Twimagen, cono afán d’amostrar la rialidá actual d’esta llengua tradicional de Llión, una llengua viva que nun se tien que perder, qu’hemos valorar y que descubriremos a traviés de la intervención de diferentes personas implicadas na súa defensa, estudiu y reivindicación.
El programa emitiráse los llunes, del próximu 19 d’outubre alantre, a las 23:00 horas en La 8 de León, y va poder vese tamién en redifusión los martes a las 17:30 h. y los domingos a las 23:30 h.
