Fumeiras en Corporales por San Xuan
Cono solsticiu de branu chega’l día más llargu del añu. La fiesta de San Juan Bautista celébrase esi día, a las 12 la ñueite entre los días 23 y 24 de xuniu
Las celebraciones de San Juan son d’orixen paganu. Nos sous rituales las características principales son el sol, el fuegu y l’augua, y las fogueiras que se prenden esa ñueite protexen de todu mal por esi añu. En Corporales, la viéspera, los mozos y mozas del puebru xúntanse pola tarde pa dir por escobas pa facer la «fumeira». Na actualidá facen dous, una no castru y la outra no mercáu (Nos dous barrios). Anguaño los patronos y las fiestas treslládanse a la fin de sumana por que pueda achegar mueita más xente, y por tanto, la fumeira fazse’l vienres dia 21, a las 22:30
Al rayar el sol prenden las fumeiras y la tradición manda: hai que dar 3 vueltas nún sentíu y outras 3 en sentíu contrariu p’asina llograr la suerte que se precisará a lo llargo’l restu’l añu. Na fumeira fazse una piqueiña ronda pol puebru acompañaos polos gaiteiros. Amás, el programa d’actividades de San Juan pa esti sábadu 22 incluye la celebración de la santa misa n’honor del patrón con precesión polas caleyas del puebru, acompañada polos famosos gaiteiros de la localidá. A las 8 y media, la nota de color más actual cona orquesta, pa despuéis de cenare, rematar baxo’l mantu estrelláu cona mirma orquesta.
La ñueite de San Juan cumo tamién se la coñoz, tien los sous oríxenes bien anteriores a la relixón cristiana. D’antiguo creyíase que la Tierra y el Sol estaban ñamoraos y qu’él nun quería sapartase d’eilla faciendo asina’l día más llargu. Las personas tenían miedu porque’l Sol nun recuperara toda la sua rellumancia pasada esta fecha y decidieron facer conxuros con fugueiras y ritos de fuegu pa que las suas llaparadas nun s’amataran. D’eiquí que se fale d’esta ñueite cumo la meyor pa facer encantamientos d’amor y de fertilidá, y xunto al efecto purificador que se-ye atribúye al fuegu la superstición diz que yíe un buen día pa escabildar a los malos espíritos.
Na ñueite de San Juan, vieyos rituales de fuegu on aguantan en Cabreira. Unu d’estos llugares yíe Corporales qu’onque treslladoron la fiesta a la fin de sumana, permanez el ritual d’atropar escobas y prende-yes fuegu al soníu de las gaitas. Dalgunos vecinos celebroron asina esti ritual paganu esti pasáu vienres, l’encomienzu del branu alredor d’una gran fumeira, arrodiando ésta por tres veces nun sentíu y outras tres n’outru pa pidir un buen añu chenu de deseyos y sin nengún tipu de males. Foi una ñueite máxica. Esti domingu pasáu foi’l solsticiu de Branu, y esti momentu foi motivu de celebración casi desde’l principiu de la humanidá y na sua mayor parte vai asociáu a creyencias paganas. Ensin embargu, la relixón en ciertu modu apoderóuse d’estas fechas rellacionándolas con dúas de las fiestas más importantes de la sua tradición.
Asina, el solsticiu de branu asociase cono día de San Juan, y el d’enviernu cona ñacencia de Jesús. Y curiosamente son las únicas ñacencias que son motivu de fiesta, pos pal restu del santoral solo recuérdanse los fallecimientos. El términu solsticiu deriva de la unión de dúas palabras latinas sol (sol) y sistere (permanecer quietu). Por unas horas va parecer que’l Sol queda quietu no cielu y cona tardiquina chega la ñueite más curtia del añu que va dar llugar al solsticiu de branu. Y a partir d’ende los días van dir encurtiándose, cumo se’l Sol fora amatándose espacín.
Cerquina de Corporales, el visitante a estas fiestas puede visitar la falda de Peña Aguda onde s’atopan restos d’una canal romana tallada en roca. Esta conducción tien dous puntos de captación: un ramal ñaz nas proximidades de Santolaya, no términu municipal d’Encinéu, a una cota de 1.300 metros d’altitú, y capta auguas na auguada septentrional de la Sierra de Cabreira. La outra procede del rieu Eria, auguas enriba del barriu de Pedrosa en Corporales. Yíe nesti puntu onde podemos ver cumo las canales romanas diríxense contra Médulas pa suministrar l’augua necesaria pa la escavación de la mina.
