Faceira presenta la VI edición del cursu d’iniciación a la llengua y cultura tradicional llionesas

L’asociación cultural mantien el sou compromisu cona defensa y promoción de la cultura llionesa, y ante l’exitu de los cursos llevaos a cabu los pasaos años, organiza esti postreiru en modu presencial que vai tener llugar na ciudá de Llión

El cursu tendrá una duración total de 50 horas lectivas que s’impartirán cada vienres entre las 17,00 y las 19,00 horas, desde’l 8 de noviembre destiañu hasta’l 22 de mayu de 2020,  concretamente nas aulas de la consultoría de formación Skala, asitiada na calle Jorge de Montemayor 6 de la capital llionesa.

Las crases de llengua contarán cumo base de trabayu cona guía gramatical de llionés Xurdir y el manual prácticu d’iniciación Falar con Xeitu, editaos entrambos los dous pola asociación Faceira, amás d’outros materiales didácticos que serán entregaos a cada alumnu drento’l preciu de matrícula. Xunto al aspectu concretamente lingüísticu, al que s’adicarán 30 horas, el cursu abordará a lo llargo d’outras 20 horas cuestiones cumo la literatura, historia, toponimia, mitoloxía, arquitectura tradicional, música y tradición oral; patrimoniu, encuestación, procesu de recuperación moderna del llionés ou comportamientos y costumes na sociedá llionesa; contando con profesores con fonda experiencia y competencia en cadagunu d’esos eiros.

Tódolos interesaos en matriculase pueden facelo presencialmente en Skala Formación, calle Jorge de Montemayor, 6, ou na web www.skalastudios.es. El prazu de matrícula remata’l próximu 6 de noviembre y el preciu de la mesma yía d’un pagu únicu de 40 €. Las prazas son limitadas. Pa más información puede contactase cona dirección de corréu asociacionfaceira@gmail.com.

• Iniciación a la llengua llionesa – 30 horas (Xairu López).
• Historia de la literatura en llengua llionesa – 2 horas. (Nicolás Bartolomé Pérez).
• Mitoloxía llionesa – 2 horas (Ricardo Escobar).
• Toponimia y mediu natural de Llión – 2 horas (Alejandro Díez).
• La destrucción del patrimoniu llionés– 2 horas (Miryan Rodríguez).
• ¿Qué ye la cultura llionesa? Características, costumes y comportamientos no substractu cultural cisastur – 2 horas (Xuan Getino).
• Historia de la recuperación moderna del llionés, la perspectiva d’un escritor – 2 horas (Xosepe Vega).
• Historia del Reinu de Llión – 2 horas (Ricardo Chao).
• Arquitectura tradicional llionesa – 2 horas   (Xuan Getino).
• Música y tradición oral llionesas – 2 horas (David Álvarez Cárcamo).
• Sociolingüística y encuestación – 2 horas (Álvaro Lobato).