Abierta la convocatoria pa llograr la certificación de llengua asturllionesa del nivel B2

El prazu p’apuntase remata’l próximu vienres 14 de febreiru y supón una meyora histórica na normalización de la llengua

La Conseyería de Cultura del Principáu d’Esturias convoca la que vai ser la primeira prueba de certificación de llengua asturllionesa. Dalgu inéditu hasta la fecha, por ser la primeira convocatoria feita en base al Marcu Européu de Referencia pa las Llenguas por una administración pública.

Onque de mano yía una prueba enfocada a la ciudadanía esturiana, neilla tamién vai poder participar cualquier persona d’outra comunidá autónoma. Nesti sentíu, las pruebas van ser na variedá d’esturianu normativu (que gramaticalmente comparte un porcentaxe muei altu d’elementos cona variedá occidental, la de más presencia en Llión) y yía bien interesante que tamién puedan participar falantes llioneses, por cuenta de que la situación de normalización lingüística d’este territoriu ameyoraría con personas que puedan acreditar este perfil de coñocencia de la llengua con certificaos oficiales.

Las pruebas d’acreditación lingüística del nivel B2 van principiar a partir del 21 de mayu y van estar sapartadas en dous bloques nos que se van facer pruebas orales y escritas teniendo en cuenta las normas ortográficas y la gramática de l’Academia de la Llingua Asturiana.

La convocatoria yía una gran oportunidá pa que los avances nun territoriu, en materia lingüística, puedan aproveitase y facer serviciu n’outros. Dando unidá asina a la llengua común.

La solicitú (impresu más copia compulsada del DNI) puede facese hasta’l próximu vienres desde una oficina de Correos cualquiera pola Lei de Procedimientu Administrativu.

Consulta eiquí las bases de la convocatoria.

¡Préstanos pula vida que nos compartas!
Share on Facebook
Facebook
Tweet about this on Twitter
Twitter
Email this to someone
email
Print this page
Print